偷嗒人妻 疑搞大國產粉絲個肚！黃子恆被封渣男

36歲黃子恆前年與當時同林恩浩仍然係夫妻嘅裕美爆婚外情，黃背負第三者之名，但經過兩年多成功洗底！估唔到嚟到2018年年尾，佢又有桃色風波，有指佢偷搭上內地一名女粉絲，二人兩度發生性行為後，女方之後更懷孕，腹中BB現已4個月大，黃子恆卻一直玩失蹤，女方惟有向傳媒爆料，黃子恆都承認與對方發生過一次性關係，更堅稱有做足安全措施，否認是BB經手人。爆開有條路，今日再有報道指黃子恆曾經喺半年內約過35E胸器的歌手迪子三次，氹對方去佢屋企「提供服務」，見對方唔落搭即冇品爆粗，網友直指他種種的行徑係渣男！其實以往都有不少劈腿、甚至棄糟糠的賤男，同樣令人咬牙切齒，以下十位賤男你要看清楚！

黃子恆獲力捧演奸角

黃子恆係近年大台上位小生之一，先後於兩大重頭劇《降魔的》(2017)和《飛虎之潛行極戰》(2018) 飾演奸角，演技備受讚賞，加上本來外型不俗，令佢多了不少粉絲！

《降魔的》劇照

 

羽壇賤男 林丹

外號「超級丹」的中國羽毛球好手林丹，與前中國羽毛球代表的太太謝杏芳被稱為羽壇的「神鵰俠侶」，謝杏芳今年11月4日更為老公誕下麟兒，一家三口樂也融融。直至11月17日，林丹被爆在太太懷孕期間與2009年環球旅遊中國小姐冠軍趙雅淇到酒店密會！林丹在房中攬實女方纖腰，更輕拍對方屁股，全程被斷正！老婆懷孕期間偷食，林丹你對得住芳芳嗎？

「名偵探趙五兒」微博圖片

老婆原諒

事後謝杏芳選擇原諒林丹，神鵰俠侶重修舊好，兩人喺網上繼續不時放閃！

謝杏芳與寶貝仔～

人如其名 吳忠義

司馬燕老公吳忠義(Togi)被爆多年前已搭上內地小三Summer Sun(孫君子)，司馬燕當時得悉姦情後，大受打擊屈出癌症！在老婆抗癌期間，Togi背妻跟Summer藕斷絲連，甚至趁老婆留院時，經常飛去北京會小三，令司馬燕身心受盡折磨，認真唔要得！後來事情峰迴路轉，Togi發聲明認曾跟Summer拍拖，但已於去年九月已分手。不過點都好啦，老婆屍骨未寒就搞三搞四，非常唔要得！

賤男導演 彭順

2014年5月，彭順背太太李心潔於圓方與o靚模李悅彤(Liddy) 密會，期間兩人肆無忌憚當眾拖手、啜嘴、搣胸、搭膊、攬腰乜都做齊，偷食斷正，彭順被網民鬧爆兼狂插係賤男。醜事曝光後，彭順即飛往馬來西亞箍煲，有傳心潔得悉事件後傷心痛哭！

 

又係老婆原諒

最後彭順與心潔就事件一起作出回應，而心潔最終選擇原諒老公，兩人和好如初。今年七月，心潔為老公誕下一對可愛孖仔，哥哥叫彭濟雲，弟弟則叫彭子然，一家四口樂也融融。

超級冇品 魏駿傑

魏駿傑1998年與滕麗名拍《陀槍師姐》撻着，人前人後都好似兩公婆咁，情侶關係一直維持至2007年中，二人正式分手。當時圈中人都覺得好奇怪，原來魏搭上比自己年輕廿載的重慶女子張利華，翌年更火速跟張利華結婚生女。後來滕麗名爆魏駿傑婚後用短訊求復合，背妻再想搞前度，冇品王仲唔係你?!

 

劈腿色狼 郭政鴻

滕麗名與冇品王魏駿傑甩拖後，於2008年被爆與郭政鴻拍《桌球天王》演情侶，啜出真愛。當阿滕以為搵到個好男人，兩人發展迅速，成為公認一對，但原來男方一直呃住阿滕結咗婚重生埋女，阿滕又被蒙在鼓裏，自己做咗小三都唔知！直至2010年9月被傳媒影到，阿滕才知道又愛錯人。阿滕2013年時跟圈外男友朱建崑結婚，終於覓得如意郎君！

 

做個好爸爸

拋妻賤男 陶大宇

一代師奶殺手最後都係因偷食而搞到身敗名裂！陶大宇同拍拖多年的太太黃寶慧搞離婚，當年盛傳介入做第三者的就係「狐妮」郭羨妮！大宇為咗呢段情放棄大好形象，成為負心賤男，可惜最後都分手收場。最離奇係大宇曾再翻撻前妻，過住「兩公婆」嘅生活，更加衰到「o趙完唱」，指郭羨妮係娛圈蕩花，呢啲反轉豬肚的行為，各位女士，認清呢種賤郎啦！

 

郭羨妮一家三口好幸福

而郭羨妮則於2011年下嫁內地武指朱少杰，育有可愛女兒Kylie，一家三口好幸福～

扮好男人 羅嘉良

03年羅嘉良轉投寰宇，北上大陸發展，夫婦聚少離多，感情進一步轉淡，撈家決定分居，並在08年初辦理離婚手續，正式結束28年情。有傳當年離婚係因第三者介入，撈家雖然否認，但相隔半年，撈家就宣布跟內地演員蘇岩將於九月結婚後誕下女兒，佢覓得第二春就開心，但有報道指前妻生活為供樓同養仔，一份炒蛋多士分開兩餐食，慳得就慳。

 

淫狼代表 陳浩民

陳浩民2011年時被本刊拍到於橫店拍劇時藉醉狼吻陳嘉桓，又對佢上下其手，以致要攜即將臨盆的太太蔣麗莎開記招，聲淚俱下向陳嘉桓道歉！在眾目睽睽之下，陳浩民硬拖着大肚妻子蔣麗莎上演大龍鳳不特止，短短7分鐘記者會中，浩民一哭二鬧三鞠躬四道歉，臨走時還作狀發軟蹄，要大肚妻攙扶，結果扮死狗失敗，更被網民罵個體無完膚！

事過境遷，蔣麗莎好好生養，為陳浩民先後誕下三女一子，希望陳浩民真心悔改做個好老公好爸爸！

月租10萬天池屋

陳浩民早年已在國內崛起，去年中全家由紅磡過千呎複式單位，進駐月租10萬的何文田半山壹號的天台特色泳池屋，全家得閒就喺天台游水，奢華到不得了…

 

 

相關文章：黃子恆緋聞多多 16年被指介入裕美婚姻

其實黃子恆都唔係第一次出現負面新聞㗎啦，2016年時佢被指介入裕美與老公林恩浩的婚姻，兩人被拍到一齊到街市買餸，期間男方更主動攬實女方腰！親蜜關係不言而喻。兩人買完餸後就返到男方位於西貢的村屋，兩人夾手夾腳準備晚飯，裕美留低過夜之餘，更被拍到在露台晾Bra！